ਸਿੱਧੂ ਮੂਸੇਵਾਲਾ ਦਾ ਨਵਾਂ ਗੀਤ ‘Ghostface Killah’ ਰਿਲੀਜ਼ | ਜਾਣੋ ਕੌਣ ਹੈ 'Ghostface Killah’

ਚੰਡੀਗੜ੍ਹ: ਮਰਹੂਮ ਪੰਜਾਬੀ ਗਾਇਕ ਸ਼ੁਭਦੀਪ ਸਿੰਘ ਸਿੱਧੂ ਉਰਫ਼ ਸਿੱਧੂ ਮੂਸੇਵਾਲਾ ਦਾ ਨਵਾਂ ਗੀਤ ‘Ghostface Killah’ ਅਧਿਕਾਰਤ ਤੌਰ ’ਤੇ ਰਿਲੀਜ਼ ਹੋ ਗਿਆ ਹੈ। ਗੀਤ ਸੋਮਵਾਰ 21 ਸਤੰਬਰ ਦੀ ਸ਼ਾਮ ਸਿੱਧੂ ਮੂਸੇਵਾਲਾ ਦੇ ਅਧਿਕਾਰਤ ਯੂਟਿਊਬ ਚੈਨਲ ’ਤੇ ਜਾਰੀ ਕੀਤਾ ਗਿਆ।

ਰਿਲੀਜ਼ ਤੋਂ ਕੁਝ ਹੀ ਘੰਟਿਆਂ ਵਿੱਚ ਗੀਤ ਨੂੰ ਯੂਟਿਊਬ ’ਤੇ ਭਰਵਾਂ ਹੁੰਗਾਰਾ ਮਿਲਿਆ। ਗੀਤ ਦੇ ਬੋਲ ਅਤੇ ਕੰਪੋਜ਼ੀਸ਼ਨ ਸਿੱਧੂ ਮੂਸੇਵਾਲਾ ਦੀ ਹੈ, ਜਦਕਿ ਸੰਗੀਤ ਮਿਊਜ਼ਿਕ ਪ੍ਰੋਡਿਊਸਰ Mxrci ਨੇ ਤਿਆਰ ਕੀਤਾ ਹੈ। ਵੀਡੀਓ ਦੇ ਵਿਜ਼ੂਅਲਜ਼ ਨਵਕਰਨ ਬਰਾੜ ਵੱਲੋਂ ਤਿਆਰ ਕੀਤੇ ਗਏ ਹਨ।ਸਿੱਧੂ ਮੂਸੇਵਾਲਾ ਦੇ ਦੇਹਾਂਤ ਤੋਂ ਬਾਅਦ ਵੀ ਉਨ੍ਹਾਂ ਦੇ ਅਣਰਿਲੀਜ਼ਡ ਗੀਤਾਂ ਨੂੰ ਲੈ ਕੇ ਪ੍ਰਸ਼ੰਸਕਾਂ ਵਿੱਚ ਖਾਸ ਉਤਸ਼ਾਹ ਦੇਖਣ ਨੂੰ ਮਿਲਦਾ ਹੈ। ‘Ghostface Killah’ ਦੀ ਰਿਲੀਜ਼ ਤੋਂ ਬਾਅਦ ਵੀ ਸੋਸ਼ਲ ਮੀਡੀਆ ਅਤੇ ਯੂਟਿਊਬ ’ਤੇ ਪ੍ਰਸ਼ੰਸਕਾਂ ਵੱਲੋਂ ਵੱਡੀ ਪ੍ਰਤੀਕਿਰਿਆ ਦੇਖਣ ਨੂੰ ਮਿਲ ਰਹੀ ਹੈ।

‘Ghostface Killah’ ਨਾਮ ਦਾ ਕਨੈਕਸ਼ਨ
Ghostface Killah ਅਮਰੀਕੀ ਹਿਪ-ਹੌਪ ਗਰੁੱਪ Wu-Tang Clan ਦਾ ਪ੍ਰਮੁੱਖ ਮੈਂਬਰ ਅਤੇ ਰੈਪਰ ਹੈ। ਉਸ ਦੀ 1996 ਵਿੱਚ ਰਿਲੀਜ਼ ਹੋਈ ਪਹਿਲੀ ਸੋਲੋ ਐਲਬਮ ‘Ironman’ ਹਿਪ-ਹੌਪ ਦੀਆਂ ਚਰਚਿਤ ਰਿਲੀਜ਼ਾਂ ਵਿੱਚ ਸ਼ੁਮਾਰ ਕੀਤੀ ਜਾਂਦੀ ਹੈ। 2026 ਵਿੱਚ ਇਸ ਐਲਬਮ ਦੀ 30ਵੀਂ ਵਰ੍ਹੇਗੰਢ ਮੌਕੇ ਇਸ ਨੂੰ ਮੁੜ ਵਿਨਾਇਲ ’ਤੇ ਜਾਰੀ ਕੀਤਾ ਗਿਆ।
‘Ghostface Killah’ ਨਾਮ ਸਿੱਧੂ ਮੂਸੇਵਾਲਾ ਦੇ ਸੰਗੀਤ ਨਾਲ ਪਹਿਲਾਂ ਵੀ ਜੁੜ ਚੁੱਕਾ ਹੈ। 2024 ਵਿੱਚ ਸਟੀਫਲੌਨ ਡੌਨ ਨਾਲ ਰਿਲੀਜ਼ ਹੋਏ ਗੀਤ ‘Dilemma’ ਵਿੱਚ ਸਿੱਧੂ ਨੇ ਆਪਣੀਆਂ ਲਾਈਨਾਂ ਦੌਰਾਨ Ghostface Killah ਅਤੇ Wu-Tang Clan ਦਾ ਜ਼ਿਕਰ ਕੀਤਾ ਸੀ। ਹੁਣ ਇਸੇ ਨਾਮ ਨਾਲ ਸਿੱਧੂ ਦਾ ਨਵਾਂ ਗੀਤ ਰਿਲੀਜ਼ ਹੋਣ ਕਾਰਨ ਪ੍ਰਸ਼ੰਸਕਾਂ ਵਿੱਚ ਇਸ ਨੂੰ ਲੈ ਕੇ ਖਾਸ ਦਿਲਚਸਪੀ ਬਣੀ ਹੋਈ ਹੈ।